तू......

 माझ्या आनंदाचे कारण तू ,

दुख: मागील सुख तू ,

प्रेमाचे धरण तू ,

या घराचे घरपण तू .

 

या अंत:रातील आत्मा तू ,

आयुष्याची व्याख्या तू ,

माझ्यावरचे संस्कार तू ,

मला घडवणारा शिल्पकार तू .

 

मी तर फक्त अक्षर आहे ,

माझ्या प्रत्येक वाक्यातील शब्द तू .

 

असलो जरी वंशाचा दिवा ,

पण त्याला जगवणारी वात आहेस तू .

 

घरी येण्याची ओढ तू ,

प्रेम,माया,ममता या सर्वांची एक सावली तू ,

आम्ही सगळे या सर्वाचा भाग आहोत ,

पण आपल्या कुटुंबाचा खरा कणा आहेस तू .

 

रागावणारे प्रेम तू ,

हसवणारी माया तू ,

सर्वांसाठी आहोरात्र झिजणारी काया आहेस तू .

 

लहानपणापासूनच शिक्षक तू ,

मला घडवणारा विषय तू ,

माझ्या आयुष्याचे पुस्तक तू ,

 

पण माझे फक्त नाव आहे,

त्यामागील यश तू .

 

मदर, मॉम, मम्मी, अशी आहेत नावे भरपूर तुला,

पण माझ्यासाठी माझी आई आहेस तू,

आई आहेस तू.

 

- सुमित वाघमारे